Shqipëria vijon të jetë nën ndikimin e reshjeve të dendura që prej ditës së djeshme, duke shkaktuar vështirësi serioze në shumë zona të vendit. Në veri situata ka qenë më e rënduar, ku zona si Shkodra, Lezha, Kurbin dhe Kruja janë përballur me përmbytje të banesave dhe evakuime të disa familjeve. Probleme të ngjashme janë raportuar edhe në Durrës, Gjirokastër dhe Vlorë, ku reshjet intensive kanë krijuar vështirësi në qarkullim dhe infrastrukturë.

Meteorologia Lajda Porja, në një lidhje televizive, tha se reshjet e forta do të vazhdojnë të jenë të pranishme edhe gjatë ditës së sotme, të mërkurë, me veriun që mbetet më i ekspozuari ndaj rrebesheve. Sipas saj, moti nuk stabilizohet menjëherë, por një ndryshim pozitiv është shumë pranë.

“Gjatë kësaj të mërkure reshjet do të jenë më të shpeshta dhe më të dendura në veri të vendit, ndërsa në qendër dhe jug do të shfaqen më të rralla. Në zonat e Lezhës, Krujës, Durrësit dhe Shkodrës presim sërish reshje me intensitet të lartë. Ndërsa në jug, përjashtuar Gjirokastrën, pritet një situatë disi më e lehtë,” tha Porja.

Megjithatë, sipas saj lajmi i mirë vjen që të enjten, kur intensiteti i reshjeve do të nisë të ulet ndjeshëm, duke krijuar hapësirën e nevojshme që uji të tërhiqet në zonat e prekura.

“E enjtja do të sjellë një qetësim të situatës. Reshjet dobësohen dhe kjo i jep mundësi terrenit të thithë ujin e tepërt. Në veri kemi pasur mbi 200 mm reshje në zona të thella, që është praktikisht një sasi mujore brenda 24 orëve. Por nga e enjtja situata nis të stabilizohet.”

Dhe ndryshe nga parashikimet fillestare, e premta sjell një ndryshim të dukshëm të motit. Pas ditëve me stuhi, vendi ynë më në fund do të marrë frymë.

“Dita e premte pritet të sjellë përmirësim të plotë të kushteve atmosferike. Reshjet do të pushojnë gradualisht në të gjithë territorin dhe në shumë zona do të kemi shfaqjen e intervaleve të gjata me diell. Kjo pritet të vazhdojë edhe gjatë fundjavës,” theksoi meteorologia.

Sipas saj, e shtuna dhe e diela do të jenë ditë më të qeta, me vranësira të pakta, temperatura në rritje të lehtë dhe prezencë të diellit sidomos në pjesën perëndimore dhe bregdetare.

Ky stabilizim i motit vjen pas një jave të ngarkuar me stuhi, ndërsa fenomeni që goditi Ballkanin u zhvendos fillimisht nga Mali i Zi drejt veriut të Shqipërisë. Tashmë, me tërheqjen e masave të lagështa ajrore, vendi pritet të hyjë në një periudhë më të ngrohtë dhe më të qëndrueshme.

Nëse reshjet e ditëve të fundit sollën ankth dhe vështirësi, e premtja dhe ditët në vijim premtojnë një kthesë të mirëpritur: qetësi atmosferike, më pak lagështi dhe rrezet e para të diellit pas një periudhe të gjatë stuhish.