Në Ditën e Pavarësisë së Kosovës, një moment tejet emocionues është regjistruar brenda shtëpisë së Big Brother VIP Albania, ku banorja Brikena ka ndarë një rrëfim prekës për historinë e saj familjare.

Ndryshe nga banorët e tjerë, të cilët festuan duke kënduar këngë patriotike për Kosovën, Brikena zgjodhi të qëndronte e ulur dhe u përlot gjatë momentit festiv. Më pas, në “Dhomën e Rrëfimit”, ajo shpjegoi arsyen e reagimit të saj emocional.

Banorja tregoi se lufta e Kosovës i ka lënë plagë të thella personale, pasi ka humbur disa familjarë gjatë asaj periudhe të vështirë. “Kam humbur disa familjarë në luftën e Kosovës. Sa herë i dëgjoj këto këngë, prekem shumë”, u shpreh ajo mes lotësh, duke kujtuar dhimbjen që familja e saj ka përjetuar.

Pavarësisht trishtimit, Brikena theksoi se ndjen krenari dhe lumturi për rrugëtimin e Kosovës ndër vite.

“Jemi të lumtur sot, duke e ditur se si kanë qenë rrethanat”, shtoi ajo, duke nënvizuar sakrificat e bëra për liri.

Rrëfimi i saj ka prekur jo vetëm banorët brenda shtëpisë, por edhe publikun, duke rikujtuar plagët e luftës dhe rëndësinë e kësaj dite për shumë shqiptarë kudo që ndodhen.