Mëngjesi i sotëm nisi me një lajm që askush nuk e priste: Shpat Kasapi, vetëm 40 vjeç, ka ndërruar jetë pas një ataku të fortë në zemër. Lajmi u konfirmua nga gazetarja e Euronews Albania, Ferikan Iljazi, e cila raportoi se këngëtari nuk ka arritur t’i mbijetojë goditjes kardiake, pavarësisht se nuk kishte pasur asnjë problem shëndetësor më herët.
Shpat Kasapi, artisti nga Tetova që u rrit në skenë, mbetet një nga zërat më të dashur të muzikës shqiptare. Me hitet e tij si “Axhami”, “Pa ty s’jetoj”, “Kush të ndau prej meje” dhe dhjetëra balada që i këndoheshin dashurisë, ai krijoi një lidhje të fortë me publikun që e ndoqi për më shumë se dy dekada.
Ajo që e bën këtë humbje edhe më të rëndë është fakti se Shpati ishte gati për një rikthim të fuqishëm në jetën publike. Vetëm pak ditë më parë ishte konfirmuar si një nga banorët e sezonit të ardhshëm të “Big Brother VIP Albania 5”, një projekt që ai e priste me shumë emocion dhe dëshirë.
Menaxheri dhe njëkohësisht miku i tij i ngushtë, Anton Prendi, foli i tronditur për “Shqipëria Live”. Ai tregoi se lajmi e ka goditur rëndë, pasi Shpati nuk kishte asnjë histori të mëparshme shëndetësore që të paralajmëronte një situatë të tillë.
“Shpresoja të ishte thjesht një makth. Është e pabesueshme për mua. Punonim bashkë prej tre vitesh dhe nuk kishte asnjë shenjë shqetësimi shëndetësor. Shpati e donte ‘Big Brother VIP’, madje unë kam qenë ai që e kam shtyrë më shumë. Kishim planifikuar çdo gjë,” – u shpreh Prendi.
Ai tregoi edhe detaje nga biseda e fundit mes tyre, një bisedë që tashmë mbetet peng dhe kujtim i dhimbshëm.
“Fola me të për një këngë të re me Erik Lloshin. Ishte i entuziazmuar. Shpati ishte njeri i qetë, i dashur me të gjithë. Nuk kishte konflikte, nuk kërkonte përplasje. Gjithmonë ka synuar të rritet profesionalisht,” – tha Prendi.
Në rrëfimin e tij, ai ndalet edhe te ana familjare e këngëtarit, duke treguar një anë të panjohur për publikun:
“Djalli i tij i vogël kishte disa vështirësi me të folurën dhe ai ishte plotësisht i përkushtuar tek trajtimet e tij. Shpati ishte mbi të gjitha baba.”
Ndërsa lajmi vazhdon të përhapet, rrjetet sociale janë mbushur me mesazhe dhimbjeje nga kolegë, miq dhe fansa që nuk po e besojnë humbjen e tij të papritur. Muzika shqiptare humbi një zë të veçantë, një artist që la gjurmë dhe një njeri të dashur që gëzoi respektin e të gjithëve që e njohën.
Një jetë e ndërprerë shumë shpejt, një talent që la pas këngë të paharrueshme dhe një dhimbje të thellë për të gjithë ata që e deshën.
