Gjatë fushatës zgjedhore, kryeministri Albin Kurti e kishte renditur pagesën e 13-të për punonjësit e sektorit publik ndër zotimet kryesore, duke theksuar se ky përfitim do të realizohej në fillim të vitit.
Megjithatë, zhvillimet paszgjedhore kanë ndikuar në shtyrjen e këtij procesi. Rinumërimi i votave ka shkaktuar vonesa në certifikimin përfundimtar të rezultateve, çka ka penguar edhe konstituimin në kohë të institucioneve të reja.
Sipas burimeve të afërta me proceset institucionale, përderisa ende nuk është përmbyllur formimi i plotë i strukturave qeverisëse, gjatë fillimit të muajit shkurt nuk pritet të ketë ekzekutim të pagesës së 13-të.
Zyrtarët e Qeverisë deri tani nuk kanë ofruar një afat të saktë për zbatimin e këtij premtimi, ndërsa mbetet e paqartë nëse paga e 13-të do të përfshihet në paketën e vendimeve të para që do të marrë Qeveria e re pas konstituimit të saj.
