Qeveria e Republikës së Kosovës ka ndërmarrë një hap të rëndësishëm humanitar në mbështetje të popullit të Gazës. Kryeministri Albin Kurti ka njoftuar se anija e ngarkuar me ndihmën humanitare të Kosovës tashmë është nisur nga porti i Mersinit në Turqi, me destinacion Gazën.

Sipas njoftimit zyrtar, ndihma humanitare ka një vlerë prej 500 mijë euro dhe përfshin tenda, pako ushqimore, batanije si dhe 158 mijë racione të ushqimit të ngrohtë, të dedikuara për banorët që po përballen me kushte tejet të rënda jetese.

Edhe pse vendimi për dërgimin e kësaj ndihme ishte marrë nga Qeveria e Kosovës që në muajin janar, realizimi i tij u bë i mundur vetëm pas marrëveshjes së fundit të paqes, e arritur nën udhëheqjen e Presidentit të Shteteve të Bashkuara të Amerikës, Donald Trump.

Kryeministri Kurti ka theksuar se kjo ndihmë përfaqëson angazhimin e Kosovës në kuadër të solidaritetit ndërkombëtar dhe përkushtimin për të mbështetur popullatën civile që po përballet me vështirësi ekstreme në Gaza. Ai ka shtuar se Qeveria aktuale është e para në historinë e Republikës së Kosovës që ofron një ndihmë të tillë për këtë rajon.

“Shpresojmë që kjo ndihmë, qoftë edhe në mënyrë modeste, të kontribuojë në lehtësimin e vuajtjeve dhe në përpjekjet për paqe, siguri dhe stabilitet për të gjithë”, thuhet në mesazhin e tij.

Në fund, Kurti ka shprehur mirënjohje të veçantë për Republikën e Turqisë dhe Gjysmëhënën e Kuqe Turke, për bashkëpunimin e ngushtë dhe ndihmën e dhënë në realizimin e këtij operacioni humanitar.