Kozak Braçi ka denoncuar publikisht një ngjarje të rëndë, duke njoftuar se bashkëshortja e tij, e cila është në muajin e fundit të shtatzënisë, është përfshirë në një aksident automobilistik.

Përmes një videoje të publikuar në rrjetet sociale, ai shfaqet tejet i revoltuar, duke treguar se ngjarja ka ndodhur në Lezhë dhe se situata i ka shkaktuar një gjendje të rënduar psikologjike.

Në qendër të reagimit të tij ishin akuzat e forta ndaj mjekëve të spitalit të Lezhës. Kozaku pretendon se stafi mjekësor ka manipuluar dokumentacionin e aksidentit kundrejt pagesave, duke u përpjekur të fshehin ngjarjen për çështje siguracionesh.

Ai theksoi se bashkëshortja e tij ndodhet në gjendje të rëndë në barelë, ndërsa paralajmëroi se do ta transferojë atë në Tiranë për të ndjekur procedurat e sakta ligjore dhe mjekësore.

Deklarata mbyllet me kërcënime të drejtpërdrejta ndaj personelit mjekësor, duke u zotuar se do ta ndjekë çështjen deri në fund ligjërisht për atë që ai e quan padrejtësi dhe manipulim të situatës shëndetësore të familjarëve të tij.

Pas denoncimit të fortë publik ndaj mjekëve të Lezhës, Kozak Braçi ka ndarë me ndjekësit edhe pamjet vizuale nga vendi ku u aksidentua bashkëshortja e tij shtatzënë.

Ngjarja, e cila ka trazuar rrjetin orët e fundit, mori vëmendje pas deklaratave të Kozakut se po tentohej manipulimi i provave, ndërkohë që tani ai ka faktuar dëmet përmes videos.

Në pamjet e publikuara shihet qartë skena e aksidentit, ku një automjet i zi shfaqet me pjesën e përparme të shkatërruar plotësisht nga përplasja e fortë.

Në vendngjarje shihen gjithashtu forca të policisë që po kryejnë matjet dhe procedurat hetimore, si dhe një automjet tjetër i dëmtuar.

Këto pamje vijnë si një vazhdimësi e reagimit të tij të ashpër, ku paralajmëroi se do të ndjekë çdo rrugë ligjore ndaj personave përgjegjës dhe stafit mjekësor që, sipas tij, nuk i dhanë trajtimin e duhur familjares së tij.