Qeveria e re e Kosovës ka zhvilluar sot mbledhjen e parë në kuadër të mandatit të ri qeverisës.
Gjatë kësaj mbledhjeje, kryeministri Albin Kurti foli për prioritetet financiare të ekzekutivit, duke u ndalur veçanërisht te çështja e pagës së 13-të për punonjësit e sektorit publik që financohen nga buxheti i shtetit.
Ai bëri të ditur se kjo pagesë është e përfshirë në buxhetin e miratuar dhe do të realizohet menjëherë pasi Ligji për Buxhetin të hyjë në fuqi. Sipas tij, ekzekutimi i saj lidhet drejtpërdrejt me procedurat ligjore dhe afatet formale të zbatimit të ligjit.
“Buxheti i ri parasheh edhe pagën e 13-të për punëtorët e sektorit publik që paguhen nga buxheti. Kjo pagë do të ekzekutohet sapo Ligji i buxhetit të hyjë në fuqi”, u shpreh Kurti para kabinetit qeveritar.
