Astrologja Meri Gjini ka ndarë parashikimin e saj të detajuar për energjitë që do të shoqërojnë shenjat gjatë muajit dhjetor, në emisionin “Mes’dritë” në Vizion Plus, me moderatorët Alma Çelaj dhe Syrjan Rahova.

Sipas saj, dhjetori nis me një Hënë të Re, e cila formohet në orët e para të ditës dhe sjell pasiguri, ngarkesë emocionale, por edhe mundësi të reja. Ajo theksoi se kombinimi i Hënës së re me Diellin dhe Mërkurin retrograd krijon situata të papritura që kërkojnë menaxhim të kujdesshëm.

Fillimet e dhjetorit vijnë me energji të forta, nisje të reja që duken stresuese, por që do t’i rezistojnë kohës dhe do sjellin rezultate pozitive. Megjithatë, sipas astrologes, duhet kujdes me komunikimin, pasi prirja për të reaguar shpejt dhe për të thënë “fjalën e fundit” është e fortë.

Gjini paralajmëron se ditët intensive do të zgjasin deri rreth datës 29 dhjetor, duke e bërë këtë muaj një periudhë të ngarkuar, por produktive.

Parashikimi i shenjave për muajin dhjetor

♈ Dashi
Dhjetori hapet me mundësi të mira profesionale. Hëna e Re ndihmon në qartësimin e situatave me eprorë apo bashkëpunëtorë, si dhe në zgjidhjen e keqkuptimeve të akumuluara kohët e fundit. Muaji sjell stabilizim të financave dhe një energji pozitive nga Venusi, që ndikon në marrëdhëniet e punës.

♉ Demi
Me Hënën e Re përballë Uranit, dhjetori sjell situata që kërkojnë zgjidhje të shpejta ose nisje të reja të detyruara. Pavarësisht presionit, Demi do ndjejë mbështetjen e plotë të rrethit familjar dhe miqve. Gjithashtu, Mërkuri dhe Venusi sjellin sqarime të rëndësishme në jetën personale.

♊ Binjakët
Dhjetori kërkon organizim dhe pastrim të axhendës. Gjërat e panevojshme duhen larguar për të fituar qartësi. Kombinimi Mërkur–Vener garanton zgjidhje të keqkuptimeve në ambientin profesional, si dhe paqe të brendshme.

♋ Gaforrja
Muaji nis me surpriza pozitive. Çështje të vjetra ose premtime që keni marrë rikthehen për t’u zgjidhur. Të papriturat e dhjetorit janë në favorin tuaj, sidomos për ekuilibrin emocional dhe përmirësimin e të ardhurave.

♌ Luani
Hëna e Re ndikon drejtpërdrejt në shtëpi dhe familje. Dhjetori kërkon vëmendje në dy drejtime: një detyrim i rëndësishëm në punë dhe një çështje të brendshme familjare, si rregullime, arredim apo përmirësim të shtëpisë. Venusi sjell tensione të vogla në komunikim—kujdes me prindërit.

♍ Virgjëresha
Dhjetori është aktiv në lëvizje, takime, udhëtime të shkurtra dhe ide të reja. Këto ditë rrisin qarkullimin tuaj shoqëror dhe hapin rrugë bashkëpunimesh të reja. Muaj i favorshëm për kreativitet.

♎ Peshorja
Muaj pozitiv emocionalisht. Pikëpyetjet e brendshme marrin formë dhe zgjidhen natyrshëm. Dhjetori sjell të ardhura të papritura ose dhurata të vogla. Kujdes i vetëm: shmangni shpenzimet e panevojshme, pasi Mërkuri retro sjell lapsuse financiare.

♏ Akrepi
Akrepi mbetet protagonist i dhjetorit. Hëna e Re te shenja e tyre sjell fuqizim emocional, por edhe detyrime që kërkojnë korrigjim të menjëhershëm. Urani përballë ju shtyn drejt komunikimit diplomatik. Muaji sjell zhvillime të mira në karrierë dhe në balancën shpirtërore.

♐ Shigjetari
Dhjetori është i mbushur me përgatitje dhe plane. Energjinë e shumëfishtë të muajit duhet ta menaxhoni me maturi. Mos u ekspozoni shumë—studioni dhe analizoni para se të ndërmerrni veprime të mëdha.

♑ Bricjapi
Muaji është perfekt për karrierën. Diskutime, ide të reja dhe mundësi për rritje profesionale janë në qendër të vëmendjes. Venusi dhe Mërkuri stabilizojnë ekonominë dhe harmonizojnë marrëdhëniet familjare.

♒ Ujori
Dhjetori kërkon kujdes me imazhin dhe reputacionin. Çështjet që lidhen me emrin, marketingun dhe mënyrën si paraqiteni janë thelbësore. Kujdes edhe në raport me fëmijët. Komunikimi i qetë është çelësi.

♓ Peshqit
Dhjetori ju ngarkon me plane familjare dhe mendime për të ardhmen. Shumë Peshq do të mendojnë për shtëpi, stabilitet dhe siguri. Mërkuri me Venusin sjellin mundësi për të zgjidhur vështirësi emocionale nga mesi i vjeshtës. Saturni dhe Neptuni u japin qetësi, ndonëse rutina do të jetë e ngarkuar.